Paplajahan 3: Parilaksana Becik Pinaka Cihna Anak sane Satya
(Lukas 6:43-49)
Parilaksana Ayu Mawit Manah sane Ayu
3
43 Raris Hyang Yesus ngandika malih sapuniki,
“Sujatine tusing ja ada punyan buah-buahan ane luung ngasilang buah ane jelek.
Keto masih tusing ada punyan buah-buahan ane jelek ngasilang buah ane luung.
44 Uli buahne kena baan nebag punyane.
Buka bet-bete ane madui tusing ja mabuah delima,
lan bet ane madui tusing ja mabuah anggur.
45 Anake ane dharma ngasilang paundukan melah,
krana paundukan ane melah maliah di kenehne.
Nanging anake ane jele ngasilang paundukan ane jele,
krana paundukan ane jele maliah di kenehne.
Krana apa ane kaucap uli bibihne,
keto di kenehne.”
Ngwangun Kapracayaan Sane Kukuh
46 Raris Hyang Yesus ngandika malih sapuniki,
“Nguda ragane ngelurin Tiang,
‘Ratu,
ratu,’
nanging ragane tusing nglaksanayang prentah Tiange?
47 Umpama ada anak ane teka sid Tiange:
yening anake ento ningehang saha nglaksanayang prentah Tiange,
48 ia buka anake ane nyujukang umah,
ngae bangbang ane dalem,
laut ngae dasar nganggon batu.
Tatkala ada blabar,
yeh tukade nyelepin umahne ento,
pastika tusing anyud krana kajujukang nganggon dasar ane kukuh.
49 Nanging anake ane ningehang prentah Tiange sakewala tusing nglaksanayang,
tan bina buka anake ane nyujukang umah tusing misi dasar.
Tatkala blabare teka,
pastika umahne ento bakal uug lan benyah maglaturan!”